नांदगावच्या श्री सिद्धिविनायक माघी उत्सवाला भाविकांची गर्दी
कोर्लई दि.१(राजीव नेवासेकर) मुरुड तालुक्यातील प्रसिद्ध असलेल्या नांदगावच्या श्री सिद्धिविनायक मंदिरात माघी उत्सवाला प्रतिवर्षाप्रमाणे यावर्षीही
भाविकांनी मोठी गर्दी केली होती.पहाटे दोन वाजता मंदिराचे पुजारी विनायक जोशी, महेश जोशी, शैलेश जोशी यांनी श्रींची शोडषोपचारे पूजा केली त्यानंतर चिटणीस गुप्ते कौटुंबिक ट्रस्ट तर्फे पूजा करण्यात आली तर सेवा मंडळातर्फे गणेश गाणार यांनी सपत्नीक केलेल्या पूजेनंतर मंदिर भक्तांसाठी खुले करण्यात आले.
पहाटे थंडीच्या कडाक्यामुळे दर्शनासाठी भाविकांची गर्दी कमी असली तरी त्यानंतर मात्र त्यात वाढ झाली.यावेळी गर्दीवर नियंत्रण ठेवण्यासाठी मुरुड पोलिस ठाण्याच्या पोलिस निरीक्षक नामदेव बंडगर यांच्या मार्गदर्शनाखाली पोलिस, गृहरक्षक दल, नजिकच्याच यशवंतनगर हायस्कूलच्या विद्यार्थ्यांनी मोठे सहकार्य केले.
सरकारी कार्यालये तथा शाळा महाविद्यालयांना सुट्टी नसल्याने दिवसभर गर्दी कमी असली तरी सायंकाळी त्यात मोठी वाढ झाली.नांदगावमधील मुख्य रस्त्यांवर सतत जाणाऱ्या येणार्या वाहनांमुळे यात्रेमुळे अडथळा निर्माण होत होता.
सकाळी १०.३० ते १.३० वाजेपर्यंत हभप महेश कुमार सरदेसाई (रत्नागिरी) यांनी जन्मोत्सवाचा सोहळा पार पाडला.चिटणीस गुप्ते कौटुंबिक ट्रस्टच्या भगिनींनी पाळणा गीत सादर केले.त्यानंतर श्रींच्या मुर्तीचे दर्शन भक्तांना घडविण्यात आले.सकाळी, सायंकाळी स्थानिक भजनी मंडळींची सुस्वर भजने व रात्री आठ वाजता पालखी मिरवणूक काढण्यात आली.
दरम्यान येथे भरलेल्या जत्रेत विविध प्रकारची मिठाई,पेढे,बर्फी,खेळणी,हार,फुले,नारळ,भजी,वडे, मिसळ,पाव व अन्य गृहोपयोगी वस्तूंची दुकाने मंदिर परिसरात थाटण्यात आली होती.मात्र परंतु प्रचंड वाढलेल्या महागाईमुळे भक्तांना खरेदीसाठी हात आखडता घ्यावा लागला.जत्रेला मोठी गर्दी उसळली होती.
टिप्पणी पोस्ट करा
0 टिप्पण्या