शेतकऱ्यांनी महा ई सेवा केंद्रात ओळख क्रमांक तयार करून घ्यावेत : रोहन शिंदे

 शेतकऱ्यांनी महा ई सेवा केंद्रात ओळख क्रमांक तयार करून घ्यावेत : रोहन शिंदे

कोर्लई,ता.२१(राजीव नेवासेकर) शेतकऱ्यांच्या कल्याणासाठी केंद्र व राज्य शासनाद्वारे राबविण्यात येणाऱ्या विविध योजनांचा लाभ घेण्यासाठी शेतकऱ्यांनी नजिकच्या महा ई सेवा केंद्रावर जाऊन शेतकरी ओळख क्रमांक (Farmer ID)तयार करून घ्यावेत.असे आवाहन मुरुड तहसीलदार रोहन शिंदे यांनी केले आहे.

     ॲग्रिस्टॅक योजना राज्यात राबविण्याबाबत महाराष्ट्र शासन कृषि,पशुसंवर्धन,दुग्धव्यवसाय विकास व मत्स्यव्यवसाय विभाग,शासन निर्णय क्रमांक संकीर्ण-2024/प्र.क्र.157//10-अे, दिनांक 14 ऑक्टोंबर 2024 अन्वये मान्यता देण्यांत आली आहे. 

सदर योजनमुळे राज्यातील शेतकऱ्यांचा कल्याणासाठी केंद्र, राज्य शासनाद्वारे राबविण्यांत येणाऱ्या विविध योजनांचा लाभ शेतकऱ्यांना सुलभ,पारदर्शक पध्दतीने वेळेवर उपलब्ध करून देणे शक्य होणार आहे.  तसेच शेतकऱ्यांना स्वस्त कर्ज,उच्च-गुणवत्तेची कृषि निविष्ठा,विपणन,स्थानिक आणि विशिष्ट तज्ञ मार्गदर्शन उपलब्ध करून देणे शक्य होणार आहे. ॲग्रिस्टॅक योजनेद्वारे शेतकऱ्यांचे शेतकरी ओळख क्रमांक (Farmer ID) तयार करण्यासाठी आता राज्यातील सर्व महा ई सेवा केंद्रावर (कॉमन सर्व्हीस सेंटर) सुध्दा सुविधा उपलब्ध करून देण्यांत आलेली आहे. त्यानुषंगाने दि. 20/1/2025 रोजी दुपारी 4.00 वाजता ॲग्रिस्टॅक योजनेद्वारे शेतकऱ्यांचे शेतकरी ओळख क्रमांक (Farmer ID) तयार करण्यासाठी मुरुड तालुक्यातील सर्व महा ई सेवा केंद्र संचालकांचे प्रशिक्षण तहसिल कार्यालय मुरुड येथे आयोजित करण्यांत आले होते. यावेळी उपस्थित महा ई सेवा केंद्र संचालकांना त्यांचे लॉगिन वरून ॲग्रिस्टॅक योजनेद्वारे शेतकऱ्यांचे शेतकरी ओळख क्रमांक (Farmer ID) कसे तयार करावे.याबाबतचे प्रशिक्षण तहसिलदार रोहन शिंदे यांनी दिले. 

    या प्रशिक्षणा वेळी हाफिजखार गावचे शेतकरी साकीब गजगे यांचे शेतकरी ओळख क्रमांक (Farmer ID) तयार करून त्यांना त्याची प्रत तहसिलदार रोहन शिंदे यांच्याहस्ते वितरीत करण्यांत आली. ॲग्रिस्टॅक योजनेद्वारे शेतकऱ्यांचे शेतकरी ओळख क्रमांक (Farmer ID) तयार करण्यासाठी  तालुक्यातील सर्व महा ई सेवा केंद्रावर (कॉमन सर्व्हीस सेंटर)  सुविधा उपलब्ध करून देण्यांत आलेली आहे. तालुक्यातील शेतकऱ्यांनी त्यांचे नजिकच्या महा ई सेवा केंद्रावर जावून शेतकरी ओळख क्रमांक (Farmer ID) तयार करून घ्यावेत.असे आवाहन तहसिलदार रोहन शिंदे यांनी यावेळी केले.