रेश्मा धुमाळ रायगड जिल्हा शिवभूमी आदर्श शिक्षिक पुरस्काराने सन्मानित

कोर्लई,ता.१९(राजीव नेवासेकर) मुरुड तालुक्यातील मजगांव येथील रायगड जिल्हा परिषदेच्या प्राथमिक शाळेच्या मुख्याध्यापिका तथा विषय शिक्षिका रेश्मा धुमाळ यांना राज्याच्या महिला व बालकल्याण मंत्री आदिती तटकरे व रोजगार हमी योजनामंत्री भरत गोगावले यांच्या हस्ते अलिबाग येथील आर.सी.एफ काॅलनी येथे झालेल्या कार्यक्रमात रायगड जिल्हा परिषदेतर्फे महाराष्ट्र शासनाचा जिल्हा आदर्श शिक्षक पुरस्काराने सन्मानित करण्यात आले.

   यावेळी रायगड जिल्हा परिषदेच्या मुख्याधिकारी नेहा भोसले, शिक्षणाधिकारी ललिता दहितुले, उपशिक्षणाधिकारी संतोष शेडगे मान्यवर उपस्थित होते. 

   माणगाव तालुक्यातील रायगड जिल्हा परिषदेच्या प्राथमिक शाळा मूर येथे सन.१९९५ पासून रेश्मा धुमाळ सेवेत रुजू झाल्या.शैक्षणिक क्षेत्रात

कार्यरत असताना त्यांनी विद्यार्थी हा केंद्रबिंदू मानून तळागाळातील विद्यार्थ्यांसाठी विशेष शैक्षणिक उपक्रम राबवले. विद्यार्थी गुणवत्ता वाढवण्यासाठी विविध उपक्रम राबवले, शिष्यवृत्ती सराव वर्ग,जादा क्लास, गृहभेटी देवून दुर्गम भागातील मुलांचा शोध घेऊन शाळेत दाखल करण्याचे कार्य त्यांनी प्रभावीपणे केले.कोरोना सारख्या महामारीत विद्यार्थ्यांच्या घरी जावून अध्यापन कार्य केले आणि विविध नाविण्यपूर्ण उपक्रम राबवले. त्यांना सामाजिक व शैक्षणिक उपक्रमांची विशेष आवड असून मुरुड तालुक्यात नाविण्यपुर्ण उपक्रम राबवणार्‍या शिक्षिका म्हणून नावलौकिक कमावला आहे. स्वतःचे You Tube Channel असून विद्यार्थी गुणवत्तेसाठी २५१ Video निर्मिती केली आहे.

यापूर्वी त्यांना आविष्कार फाउंडेशनचा राज्यस्तरीय गुणवंत शिक्षिका पुरस्कार, जिल्हास्तरीय नारीशक्ती पुरस्कार व मुरुड तालुका आदर्श शिक्षिका पुरस्काराने सन्मानित करण्यात आले आहे.३० वर्षांची प्रेरणादायी शैक्षणिक वाटचाल धुमाळ यांनी पूर्ण केली असून मजगांवच्या आदर्श प्राथमिक शाळेत मुख्याध्यापिका म्हणून कार्यरत आहेत तसेच अलिबाग शिक्षक पतपेढी मध्ये व्हाईसचेअरमन म्हणून प्रभावी कार्य करून सहकार क्षेत्रात आपला ठसा उमटविला. या भरीव कार्याची दखल घेवून रायगड जिल्हा परिषदेमार्फत अत्यंत मानाचा समजला जाणारा शिवभूमी जिल्हा आदर्श पुरस्कार देवून त्यांचा गौरव केला. या पुरस्कार गौरव प्रसंगी अलिबाग -मुरुड मतदार संघाचे आमदार महेंद्रशेठ दळवी, गटविकास अधिकारी राजेंद्रकुमार खताळ, गटशिक्षणाधिकारी सुनिल गवळी आदी़ं.सह तालुक्यातील सर्व शिक्षकांनी धुमाळ यांचे अभिनंदन करुन पुढील यशस्वी कारकिर्दीसाठी शुभेच्छा दिल्या आहेत.