मुरुड मध्ये आजही जोरदार पाऊस : जनजीवन विस्कळित

कोर्लई,ता.२५(राजीव नेवासेकर) मागील आठवड्यापासून पडत असलेल्या जोरदार पावसाने मुरुड शहरासह तालुक्यातील जनजीवनावर परिणाम दिसून येत असून रात्री पासूनच जोरदार वादळ पावसामुळे आजही तहसीलदार, वनविभाग, सेतू तसेच परेश हॉटेल, मारुती नाका ते एकदरा रस्त्यावर खड्डे पडून साचल्याने वाहनचालकांना वाहने चालवताना कसरत करावी लागत होती.मुरुडमध्ये दि. 25जुलै2024 रोजी 74 मि.मि.पावसाची नोंद झाली असून आतापर्यंत 2028 मि.मि.पावसाची नोंद झाली आहे.

  गेल्या आठवड्यापासून तालुक्यात जोरदार पाऊस पडत असून कोर्लई, बोर्ली,बारशिव, काशिद, नांदगाव मजगांव भागात रस्त्यावर काही ठिकाणी पाणी साचले होते.पावसामुळे तहसीलदार वनविभाग सेतू कार्यालय परेश हॉटेल मारुती नाका ते एकदरा रस्त्यावर खड्डे पडून पाणी साचल्याने तालुक्यातून विविध ठिकाणांहून येणाऱ्या नागरिक व वाहनचालकांना त्रास सहन करावा लागला.

  जोरदार पावसाने साळाव -मुरुड रस्त्यावर काही ठिकाणी तर मुरुड आगरदांडा रोहा रस्त्यावर खार आंबोली येथे झाडं पडण्याचा घटना घडल्या.तालुक्यात तसेच ग्रामीण भागात अद्याप कोणतीही जिवित व वित्त हानी झाली असल्याचे वृत्त नसून वादळी वाऱ्यासह पडणाऱ्या पावसाचा जनजीवनावर परिणाम दिसून येत आहे.